Arxeoloq-alim beynəlxalq konfransın sertifikatına layiq görülüb
AMEA-nın Arxeologiya, Etnoqrafiya və Antropologiya İnstitutunun aparıcı elmi işçisi tarix üzrə fəlsəfə doktoru Vəfa Mahmudova Liviyanın paytaxtı Tripoli şəhərində onlayn keçirilən VI Beynəlxalq Afrika Konfransında iştirak edib.
Bu barədəAZƏRTAC-a AMEA-dan bildirilib. Dünyanın 65-dən çox ölkəsindən alimlərin iştirak etdiyi tədbirdə V.Mahmudova Arxeologiya, Etnoqrafiya və Antropologiya İnstitutunda rəhbərlik etdiyi Muğan neolit-eneolit ekspedisiyasının Cəlilabadın Paşatəpə abidəsində apardığı qazıntılar zamanı əldə olunan unikal bəzəklər haqqında məlumat verib.
Azərbaycanlı alimin çıxışı iştirakçılar tərəfindən maraqla qarşılanıb. O, apardığı tədqiqatlara və sammitin işinə verdiyi töhfələrə görə sertifikatla təltif olunub.
