2021-ci il dekabrın 27-də elan edilən müsabiqənin müsahibə mərhələsinin keçirilmə qrafiki müəyyən edilib.

Dövlət İmtahan Mərkəzindən (DİM)AzEdu.az-abildirilib ki, elan üzrə 67 dövlət orqanında mövcud olan inzibati dövlət qulluğu vəzifələrinə aid 717 vakant vəzifə müsahibəyə çıxarılıb.
Elana çıxarılan vəzifələr üzrə qeydiyyatdan keçmiş 1811 namizədlə 3217 müsahibənin keçirilməsi planlaşdırılır. Ən yüksək müraciət sayı Qaçqınların və Məcburi Köçkünlərin İşləri üzrə Dövlət Komitəsi, Repatriasiya Departamenti, məsləhətçi (1 vakant yer üzrə 396 namizəd), Qida Təhlükəsizliyi Agentliyi, Bakı regional bölmə, Qeydiyyat və sahibkarlarla iş sektoru, məsləhətçi (1 vakant yer üzrə 192 namizəd) vəzifələri üzrə qeydə alınıb.
Müsahibələrin fevralın 14–dən mayın 31-dək keçirilməsi nəzərdə tutulur. Müsahibədə iştirak üçün qeydiyyatdan keçmiş namizədlər müsahibənin vaxtı və yeri haqqında daha ətraflı məlumatı DİM-in saytından əldə edə bilərlər.
Nəzərə almaq lazımdır ki, müsahibələrin təşkili və keçirilməsi üçün DİM və dövlət orqanları tərəfindən kifayət qədər vəsait və resurs sərf olunur. Namizədlərin müsahibədə üzrlü səbəblər olmadan iştirak etməməsi onların məsuliyyətsizliyi kimi xarakterizə edilir və belə hallar Mərkəzin məlumat bazasında qeydiyyata alınır.

Namizəd müsahibənin keçirilmə tarixindən bir gün əvvəl saat 16:00-dək müsahibələrin keçirilmə qrafikində şəxsi kabinetinin nömrəsini seçib açılan müraciət formasında "İMTİNA" düyməsini sıxmaqla müsahibədə iştirakdan imtina edə bilər. Bu hal namizədin ödənişsiz qaydada iştirak hüququ nəzərdə tutan müsahibə sayında nəzərə alınmayacaq, eyni zamanda, müsahibədə iştirakla bağlı ödəniş (olduğu halda) namizədin şəxsi kabinetinə geri qaytarılacaqdır.

Dövlət qulluğuna qəbul üçün test imtahanından keçdiyini təsdiq edən sertifikatı olan şəxs həmin sertifikatın qüvvədə olma müddətinin hər ili ərzində beş müsahibədə iştirak etmək üçün ödənişsiz müraciət edə bilər. Beşdən artıq müsahibədə iştirak ödənişlidir. Müsahibədə iştirak etmək üçün ödənişin məbləği Azərbaycan Respublikasının Tarif Şurası tərəfindən müəyyən edilir.

Müsahibədə üzrlü səbəblərdən iştirak etməyən namizədlə həmin vakant vəzifə üzrə (elan edilmiş cari müsahibə üzrə) yeni müsahibənin təşkili yalnız müvafiq təsdiqedici sənəd nəzərə alınmaqla həyata keçirilə bilər.

Namizədlərdən müsahibənin başlanma vaxtından ən azı 30 dəqiqə əvvəl müsahibələrin keçiriləcəyi binaya yaxınlaşmaları xahiş olunur.