UNEC-in gənc tədqiqatçısı Qlazqo Universitetini ən yüksək göstərici ilə bitirib
Azərbaycan Dövlət İqtisad Universiteti (UNEC) Empirik Tədqiqatlar Mərkəzinin tədqiqatçısı Nicat Muradzadə dünyanın ən nüfuzlu 100 ali təhsil müəssisəsi sırasında yer alan Böyük Britaniyanın Qlazqo Universitetinin beynəlxalq iqtisadiyyat ixtisası üzrə magistratura dərəcəsini ən yüksək göstərici ilə bitirib.
UNEC-dənAZƏRTAC-a bildirilib ki, N.Muradzadə ali təhsil aldığı müddətdə universitetin üstün müvəffəqiyyət təqaüdü olan “Kansler təqaüdü”nə layiq görülüb. Yazdığı kurs işləri və dissertasiyası isə nümunəvi elmi əsər kimi universitet kitabxanasında saxlanılır. N.Muradzadə bundan öncə Türkiyənin İstanbul Universitetinin biznes və idarəetmə ixtisası üzrə bakalavr dərəcəsini ilk üçlükdə tamamlamışdı. O, bir kitabın, 4 elmi məqalənin, 2 konfrans materialının, bir neçə praktiki tövsiyənin, Azərbaycan və ingilis dillərində yerli və xarici mətbuatda dərc olunmuş çoxsaylı elmi-publisistik məqalənin müəllifidir.
